Web Desk
മെയ് 2 ന് നടക്കുന്ന വോട്ടെണ്ണലിനോട് അനുബന്ധിച്ച് നാളെ മുതല് ചൊവ്വാഴ്ച്ച വരെ സംസ്ഥാനത്ത് ഒരുതരത്തിലുള്ള കൂടിച്ചേരലുകളും ഉണ്ടാകരുതെന്ന് ഹൈക്കോടതി. കൊവിഡ് മാര്ഗനിര്ദേശങ്ങള് ലംഘിച്ച് ഒത്തുകൂടുന്നവര്ക്കെതിരെ കര്ശന നടപടി സ്വീകരിക്കണമെന്നും ഹൈക്കോടതി നിര്ദ്ദേശം നല്കി.
വോട്ടെണ്ണല് ദിനത്തില് നടക്കാന് സാധ്യതയുള്ള ആള്ക്കൂട്ട പ്രകടനങ്ങളും വിജയാഹ്ലാദങ്ങളും ഹൈക്കോടതി വിലക്കിയിട്ടുണ്ട്. മാര്ഗനിര്ദേശങ്ങള് ലംഘിച്ച് ഒത്തുകൂടുന്നവര്ക്കെതിരെ കര്ശന നടപടി സ്വീകരിക്കണമെന്നും ഹൈക്കോടതി നിര്ദ്ദേശിച്ചു. അനധികൃതമായി ഒത്തുകൂടുന്നവര്ക്കെതിരെ പകര്ച്ചവ്യാധി പ്രതിരോധ നിയമമനുസരിച്ച് കേസെടുക്കണമെന്നാണ് ഹൈക്കോടതി ആവശ്യപ്പെട്ടത്. രാഷ്ട്രീയപാര്ട്ടികളുടെ വിജയാഹ്ലാദ പ്രകടനങ്ങള് അനുവദിക്കരുതെന്നും പൊലീസും ജില്ലാ ഭരണകൂടവും ഇക്കാര്യം ഉറപ്പു വരുത്തണമെന്നും കോടതി നിര്ദേശിച്ചു.
കോവിഡ് രൂക്ഷമാകുന്ന സാഹചര്യത്തിൽ സംസ്ഥാനത്തു മേയ് 4 മുതൽ 9 വരെ ലോക്ഡൗണിനു സമാനമായ കർശന നിയന്ത്രണങ്ങൾ ഏർപ്പെടുത്താൻ തീരുമാനിച്ചിരുന്നു. കഴിഞ്ഞ ശനി, ഞായർ ദിനങ്ങളിൽ ഏർപ്പെടുത്തിയതിനു തുല്യമായ കടുത്ത നിയന്ത്രണമാകും നടപ്പാക്കുക. ഇവ ലംഘിക്കുന്നവർക്കെതിരെ ദുരന്തനിവാരണ നിയമപ്രകാരം കേസെടുക്കുമെന്നു മുഖ്യമന്ത്രി പിണറായി വിജയൻ അറിയിച്ചിരുന്നു.
ജനജീവിതം കാര്യമായി തടസ്സപ്പെടുത്താതെ തന്നെ സഞ്ചാരവും ആൾക്കൂട്ടവും ഒഴിവാക്കുകയാണു ലക്ഷ്യം. സർക്കാർ ഓഫിസുകൾ പ്രവർത്തിക്കുന്നതു സംബന്ധിച്ചു പിന്നീടു തീരുമാനിക്കും. സിനിമ, സീരിയൽ, ഡോക്യുമെന്ററി ഷൂട്ടിങ് നിർത്തിവച്ചു.