Web Desk
ജലനിരപ്പുയര്ന്നതോടെ മുല്ലപ്പെരിയാര് അണക്കെട്ടിന്റെ സ്പില്വേ ഷട്ടറുകള് തുറന്ന് തമിഴ്നാട്. 9 സ്പില് വേ ഷട്ടറുകളാണ് തുറന്നത്. പെരിയാറിന്റെ തീരത്തുള്ള മഞ്ജുമല, വള്ളക്കടവ്, ചപ്പാത്ത്, ആറ്റോരം, കടശ്ശിക്കാട് പ്രദേശങ്ങളില് വീടുകളില് വെള്ളം കയറി. പിന്നാലെ മൂന്ന് ഷട്ടറുകള് അടച്ചു. 9 ഷട്ടറുകള് ഒരുമിച്ച് തുറന്നതോടെ നിരവധി വീടുകളില് വെള്ളം കയറി. വേണ്ടത്ര മുന്നറിയിപ്പ് നല്കാതെ ഷട്ടര് തുറക്കുന്നത് വലിയ ബുദ്ധിമുട്ടി സൃഷ്ടിക്കുകയാണെന്ന് പ്രദേശവാസികള് പറയുന്നു.
അതേസമയം മുല്ലപ്പെരിയാര് വിഷയത്തില് അടിയന്തര ഇടപെടല് ആവശ്യപ്പെട്ട് കേരളം ഇന്ന് സുപ്രീംകോടതിയെ സമീപിക്കും. മുല്ലപ്പെരിയാറില് പുതിയ ഡാം വേണമെന്ന കേരളത്തിന്റെ ആവശ്യം കേന്ദ്രസര്ക്കാര് തള്ളി. പുതിയ ഡാം നിര്മിക്കണോ എന്ന് തീരുമാനിക്കേണ്ടത് ഡാമിന്റെ ഉടമസ്ഥാവകാശമുള്ള തമിഴ്നാടാണ്. പുതിയ അണക്കെട്ട് വേണോ വേണ്ടയോ എന്ന് നിര്ദേശിക്കില്ലെന്നും കേന്ദ്രസര്ക്കാര് വ്യക്തമാക്കുന്നു. ലോക്സഭയില് രേഖാമൂലമാണ് ഇക്കാര്യം കേന്ദ്രം വ്യക്തമാക്കിയത്.