Web Desk
കേരളത്തിലെ സ്ത്രീകളുടെയും പെണ്കുട്ടികളുടെയും സുരക്ഷ ഉറപ്പാക്കണമെന്നാവശ്യപ്പെട്ട് ഉപവാസമനുഷ്ഠിക്കുന്ന ഗവര്ണര് ആരിഫ് മുഹമ്മദ് ഖാന് അഭിവാദ്യങ്ങള് അര്പ്പിച്ച് കേന്ദ്രമന്ത്രി വി മുരളീധരന്. ഇന്ത്യന് ഭരണചരിത്രത്തിലെ അപൂര്വ കാഴ്ചയാണിതെന്നും ഗാന്ധിയന് മാര്ഗത്തിലൂള്ള ഈ പ്രതിഷേധത്തിലൂടെ ഗവര്ണര് നല്കുന്ന സന്ദേശം ഭരണതലപ്പത്തുള്ളവരുടെ കണ്ണുതുറപ്പിക്കട്ടെയെന്നും അദ്ദേഹം ഫെയ്സ്ബുക്കില് കുറിച്ചു.
സംസ്ഥാന സര്ക്കാറിനെ രൂക്ഷമായി വിമര്ശിച്ച വി മുരളീധരന് കേരളത്തിലെ നിയമവാഴ്ച സമ്പൂര്ണ്ണമായി തകര്ന്നിരിക്കുന്നുവെന്നും ലഹരി കടത്ത്, സ്വര്ണ്ണക്കടത്ത് മാഫിയകളുടെ ഇഷ്ടലക്ഷ്യമാണിന്ന് കേരളമെന്നും അഭിപ്രായപ്പെട്ടു. ആഭ്യന്തര വകുപ്പ് ഇത്ര ദയനീയമായി പരാജയപ്പെട്ട കാലഘട്ടം സമീപകാലത്തുണ്ടായിട്ടില്ലെന്നും അദ്ദേഹം കൂട്ടിച്ചേര്ത്തു.