Web Desk
ഏകീകൃത സിവില് കോഡും ജനസംഖ്യാ നിയന്ത്രണവും ബിജെപി രാജ്യത്ത് നടപ്പിലാക്കുമെന്ന് ബിജെപി എം.പിയും തൃശ്ശൂരിലെ ബിജെപി സ്ഥാനാര്ഥിയുമായ സുരേഷ് ഗോപി. രാജ്യസ്നേഹമുള്ളവര്ക്ക് ഇത് അംഗീകരിക്കാതിരിക്കാന് സാധിക്കില്ലെന്നും അദ്ദേഹം പറഞ്ഞു. വാര്ത്താ ഏജന്സിയായ എ.എന്.ഐയോട് പ്രതികരിക്കുകയായിരുന്നു അദ്ദേഹം.രാജ്യത്തെ എല്ലാ പൗരന്മാരുടെയും അവകാശങ്ങള് സംരക്ഷിക്കുന്നതിന് ഏകീകൃത സിവില് കോഡ് നടപ്പിലാക്കും. ജനസംഖ്യാ നിയന്ത്രണത്തിനുള്ള നടപടികളും സ്വീകരിക്കും. ജനാധിപത്യപരമായ രീതിയിലായിരിക്കും ഇവ നടപ്പിലാക്കുക. രാജ്യത്തോട് സ്നേഹമുള്ളവര്ക്ക് ഇക്കാര്യം അംഗീകരിക്കാതിരിക്കാനാവില്ല. ലൗ ജിഹാദ്, ശബരിമല വിഷയങ്ങളില് ഉള്ള ഏതൊരു ഇടപെടലും നിയമത്തിന്റെ വഴിയിലൂടെ ആയിരിക്കുമെന്നും സുരേഷ് ഗോപി പറഞ്ഞു.
ഭരണനിര്വഹണത്തിനുള്ള ബിജെപിയുടെ ശേഷി അറിയണമെങ്കില് കഴിഞ്ഞ ഏഴ് വര്ഷത്തെ കേന്ദ്രസര്ക്കാരിന്റെ ഭരണം പരിശോധിച്ചാല് മതി. ബിജെപിയെ അധികാരത്തിലെത്തിച്ചാല് ആത്മവിശ്വാസത്തോടെയും ആത്മാര്ഥതയോടെയും ഭരണനിര്വഹണം നടത്തും. ആരായിരിക്കും മുഖ്യമന്ത്രിയെന്ന് ഇപ്പോള് പറയാന് സാധിക്കില്ല. അക്കാര്യം പാര്ട്ടി തീരുമാനിക്കും. മുഖ്യമന്ത്രി എന്ന നിലയില് ഇ. ശ്രീധരന് മികച്ച ആളായിരിക്കുമെന്നും സുരേഷ് ഗോപി പറഞ്ഞു.