Report; Web Desk
അഭയ കേസില് നിരപരാധിയാണെന്ന് പ്രതി ഫാ. തോമസ് എം. കോട്ടൂര്. സിബിഐ കോടതി കുറ്റക്കാരാണെന്ന് വിധിച്ചശേഷം ആരോഗ്യപരിശോധനകള്ക്കായി എത്തിച്ചപ്പോള് മാധ്യമങ്ങളോട് പ്രതികരിക്കുകയായിരുന്നു ഫാ. തോമസ് എം. കോട്ടൂര്. കോടതി വിധിയില് ഒന്നും പറയാനില്ല. ദൈവം കൂടെയുണ്ട്. കുറ്റം ചെയ്തിട്ടില്ല. നിരപരാധിയാണ്. ഇത്തരത്തിലൊരു വിധി പ്രതീക്ഷിച്ചിരുന്നില്ല. മേല്ക്കോടതിയെ സമീപിക്കുമോ എന്ന കാര്യത്തില് തീരുമാനമെടുത്തിട്ടില്ലെന്നും ഫാ. തോമസ് എം. കോട്ടൂര് പറഞ്ഞു.
അഭയ കേസില് ഫാ. തോമസ് എം. കോട്ടൂരും സിസ്റ്റര് സെഫിയും കുറ്റക്കാരാണെന്നാണ് സിബിഐ കോടതി വിധിച്ചത്. പ്രതികളുടെ ശിക്ഷ നാളെ വിധിക്കും. പ്രതികള്ക്കെതിരെ ശക്തമായ സാഹചര്യ തെളിവുകളുണ്ടെന്ന് കോടതി വ്യക്തമാക്കി. സാക്ഷിമൊഴികള് വിശ്വസനീയമാണെന്നും കോടതി വിലയിരുത്തി. പ്രതികള്ക്കെതിരെ കൊലപാതകം, തെളിവ് നശിപ്പിക്കല് വകുപ്പുകളാണ് ചേര്ത്തിരിക്കുന്നത്. ഐപിസി 302, ഐപിസി 201 വകുപ്പുകള് നിലനില്ക്കുമെന്നും കോടതി പറഞ്ഞു.