Web Desk
രണ്ട് വയസുകാരിയെ 14 വയസുകാരൻ ബലാത്സംഗം ചെയ്തു. കഴിഞ്ഞ ഞായറാഴ്ച പട്യാല നഗരത്തിലെ യാദവീന്ദ്ര കോളനിയിലാണ് സംഭവം നടന്നത്. പെൺകുട്ടിയുടെ മാതാപിതാക്കൾ നൽകിയ പരാതിയുടെ അടിസ്ഥാനത്തിൽ 14കാരനെ പോലീസ് പിടികൂടിയതായാണ് റിപ്പോർട്ട് .
പിടിയിലായ ആൺകുട്ടിക്കെതിരെ പോക്സോ പ്രകാരം കേസെടുത്തതായി പോലീസ് അറിയിച്ചു. പെൺകുട്ടിയെ ആശുപത്രിയിൽ ചികിത്സയിലാണെന്നും വൈദ്യപരിശോധന സംബന്ധിച്ച റിപ്പോർട്ടുകൾ ലഭിക്കേണ്ടതുണ്ടെന്നും പോലീസ് പറഞ്ഞു.
ആൺകുട്ടിയും കുടുംബവും ഉത്തർപ്രദേശിൽ നിന്നുള്ള തൊഴിലാളികളാണ്. രണ്ട് കുടുംബങ്ങളും അടുത്തടുത്തായിട്ടാണ് താമസം. കെട്ടിടത്തിൻ്റെ ടെറസിൽ കളിക്കുന്നതിനിടെയാണ് ആൺകുട്ടി രണ്ട് വയസുകാരിയെ ബലാത്സംഗം ചെയ്തത്. കുട്ടിയുടെ കരച്ചിൽ കേട്ട് താഴത്തെ നിലയിൽ നിന്നും അമ്മയും ബന്ധുക്കളും ടെറസിൽ എത്തിയപ്പോഴാണ് വിവരമറിയുന്നത്. ഇതിനിടെ ആൺകുട്ടി ഓടിരക്ഷപ്പെടുകയും ചെയ്തു. മകൾ ബലാത്സംഗത്തിനിരയായെന്ന് വ്യക്തമാക്കി ഞായറാഴ്ചയാണ് കുടുംബം പോലീസിൽ പരാതി നൽകിയത്. ഐപിസി 376 (ബലാത്സംഗം), പോക്സോ നിയമത്തിലെ സെക്ഷൻ 4 എന്നിവ പ്രകാരം പതിനാലുകാരനെതിരെ കേസ് എടുത്തതായി അന്വേഷണ ഉദ്യോഗസ്ഥൻ ലഖ്വീന്ദർ സിംഗ് പറഞ്ഞു. പിടിയിലായ ആൺകുട്ടിയെ ജുവനൈൽ കോടതിയിൽ ഹാജരാക്കി. യാദവീന്ദ്ര കോളനിയിലെ ഒരു സ്വകാര്യ സ്കൂളിലെ എട്ടാം ക്ലാസ് വിദ്യാർഥിയാണ് ആൺകുട്ടി.