newsdesk
ഈ അടുത്തകാലത്ത് നമ്മുടെയൊക്ക മനസിനെ ഏറെ വേദനിപ്പിക്കുന്ന വാർത്തകൾ ആയിരുന്നു കുട്ടികൾക്ക് നേരെ ഉള്ള പല വിധത്തിൽ ഉള്ള പീഡനങൾ ,പാറിപ്പറന്ന് നടക്കുന്ന പിഞ്ചോമനകളെ പിച്ചിച്ചീന്തുന്ന ആ ദുഷ്ടന്മാരെ സമൂഹത്തിൽ നിന്നും തന്നെ തുടച്ചുനീക്കണം എന്ന് ആഗ്രഹിക്കാത്തവർ ആരുമുണ്ടാവില്ല .പക്ഷെ ദിനംപ്രതി ഇത്തരക്കാർ പെരുകുന്ന കാഴ്ചയാണ് നമ്മൾ കാണുന്നത് .അതിനും കാരണങ്ങൾ ഏറെയുണ്ട്
എന്താണ് പീഡോഫിലിയ എന്ന ലൈംഗിക വൈകൃതം? ഇതൊരു രോഗമാണോ?
കുട്ടികളോട് ലൈംഗീകാകര്ഷണം തോന്നുന്ന പീഡോഫീലിയ (Pedophilia) എന്ന മാനസിക രോഗം അത്രപെട്ടന്ന് ഉറ്റ സുഹൃത്തുക്കള്ക്കോ ബന്ധുക്കള്ക്കോ തിരിച്ചറിയാന് സാധിക്കില്ല. പീഡോഫീലിയ ഒരു രോഗമാണ്. ഈ രോഗം ആദ്യം മനസിലാക്കാന് കഴിയുന്നത് രോഗിക്കുതന്നെയാണ്. സ്വന്തം പ്രവര്ത്തിയിലൂടെ മറ്റുള്ളവരും സമൂഹവും അറിഞ്ഞ് വരുമ്പോള് രോഗിയുടെ ശരീരവും രോഗാവസ്ഥയിലെത്തിച്ചേരും. ഇതൊഴിവാക്കേണ്ടത് മറ്റാരേക്കാളും രോഗിയുടെ ആവശ്യമാണ്. എന്നാല് സ്വന്തം ലൈംഗീക ആവശ്യങ്ങള് നിറവേറ്റുന്നതിന് സുരക്ഷിതരായിരിക്കുന്നതിന് വേണ്ടിയാണ് ഇത്തരക്കാര് കുട്ടികളുടെ നഗ്നദൃശ്യങ്ങള് കാണുകയും സമാന മനസ്കരുമായി അത് പങ്കിടുകയും ചെയ്യുന്നത്.
ഒരിക്കല് പിടിക്കപ്പെട്ടാലും ശിക്ഷ കഴിഞ്ഞ് തിരികെ വരുന്നവര് വീണ്ടും അത്തരം കാര്യങ്ങള് ചെയ്യുന്നുവെന്നത് പീഡോഫൈലുകളായ ആളുകളുണ്ടെന്നതിന് തെളിവാണ്. ഇത്തരക്കാരെ കണ്ടെത്തിയാല് അവരെ നിയമം അനുശാസിക്കുന്ന ശിക്ഷ നല്കിയതുകൊണ്ട് മാത്രം ഇതിനൊരു അറുതിയുണ്ടാകില്ല. അതിന് കൃത്യമായ ചികിത്സയാണ് വേണ്ടതെന്ന് നിരവധി തവണ റിപ്പോര്ട്ടുകള് വന്നിട്ടും നടപടിയുണ്ടായിട്ടില്ല.
പതിമൂന്നുവയസ്സോ അതിനു താഴെയോ പ്രായമുള്ള കുട്ടികളോട് ആവര്ത്തിച്ചനുഭവപ്പെടുന്ന തീവ്രമായ ലൈംഗികാകര്ഷണം, അനുബന്ധതാല്പര്യങ്ങള്, മനോരാജ്യങ്ങള് എന്നിവയും ഇത്തരം ത്വരകള് മൂലം കുട്ടികള്ക്കുനേരെ നടത്തുന്ന അനുചിത ചേഷ്ടകളുമെല്ലാം പീഡോഫീലിയയുടെ മുഖമുദ്രകളാണ്. ഈ താല്പര്യത്തിന്റെ തീവ്രത പലപ്പോഴും ഒരു മുതിര്ന്ന വ്യക്തിക്ക് പ്രായപൂര്ത്തിയായ എതിര്ലിംഗക്കാരോട് തോന്നുന്നതിനു തുല്യമോ അതിലും കൂടുതലോ ആയിരിക്കാം. ഈ ലക്ഷണങ്ങള് വ്യക്തിപരവും സാമൂഹികവുമായുമുള്ള അസ്വസ്ഥതകളും ക്ലേശങ്ങളുമെല്ലാം ഉളവാക്കുമ്പോളാണ് ഈയവസ്ഥയ്ക്ക് ഒരു മാനസീകക്രമക്കേടിന്റെ പദവി കൈവരുന്നത്. അതായത് പീഡോഫീലിയ ഒരസുഖമെന്ന നിലയില് (Pedophile disorder) കണക്കാക്കപ്പെടണമെങ്കില് തങ്ങളുടെ വികലമായ ലൈംഗിക താല്പര്യങ്ങള് ഇക്കൂട്ടര്ക്ക് മാനസീകസംഘര്ഷങ്ങള് സൃഷ്ടിക്കാന് തുടങ്ങണം.
ഇത്തരം മാനസിക രോഗങ്ങളുള്ളവരെ മാത്രം ലക്ഷ്യമിട്ടും അതേ താത്പര്യങ്ങളുള്ളവരെ കണ്ടെത്തിയും പ്രവര്ത്തിക്കുന്ന റാക്കറ്റുകളാണ് പോലീസിന്റെ തലവേദന. അതിനെ എങ്ങനെ നേരിടാനാകുമെന്നാണ് നിയമസംവിധാനം നോക്കുന്നത്. ഇത് ശരിക്കും നമ്മുടെ നിയമ സംവിധാനങ്ങള് നിരവധി പരീക്ഷണങ്ങളും പ്രതിസന്ധികളും നേരിടുന്ന മേഖലയാണിത്.
വിദ്യാര്ഥികള് ഇരയും ഇരപിടിയനും ആകുമ്പോള്
വിദ്യാര്ഥികളും കൂടുതലായി കുട്ടികളുടെ നഗ്നദൃശ്യങ്ങള് കാണുന്നതും പ്രചരിപ്പിക്കുന്നതും വര്ധിക്കുന്നുവെന്ന് സൈബര് ഡോം പറയുന്നു. മാത്രമല്ല സമൂഹത്തില് കൂടുതല് ഉന്നതരായ ഐടി പ്രൊഫഷനിലുള്ള വ്യക്തികളും ഈ കണ്ണികളില് ധാരാളമുണ്ട്. തങ്ങളെ പിടിക്കില്ല എന്ന വിശ്വാസം അവര്ക്കുണ്ട്. വീണ്ടും വീണ്ടും ഇതേ കുറ്റം ചെയ്യുന്നവരെ കണ്ടെത്തിയിട്ടുണ്ട്. ഇതില് കൂടുതലും വരുന്നത് പ്രായപൂര്ത്തിയാകാത്തവരാണ്. അവരെ കൗണ്സിലിങ്ങിലൂടെ ബോധവത്കരിക്കുകയാണ് ചെയ്യുന്നത്. 15- മുതല് 17 വരെയുള്ള പ്രായത്തിലുള്ളവര്. അല്ലാത്തവരും ഉണ്ട്. പ്രായപൂര്ത്തിയാകാത്തവരെ കൗണ്സിലിങ് നല്കി അതിന്റെ ദൂഷ്യവശങ്ങള് മനസിലാക്കി കൊടുക്കുകയാണ് ചെയ്യുക. അങ്ങനെ മാത്രമേ അവരെ നേരായ വഴിയില് കൂടി കൊണ്ടുവരാന് സാധിക്കൂ. കുട്ടികള് കൂടുതലും കൃത്യമായ അറിവില്ലാതെയാണ് ഇത്തരം സൈറ്റുകളിലേക്ക് പോകുന്നത്.
.
ലോകത്തിലെ നേർ കാഴ്ചകൾ
ജൈവലോകത്തെ ഏതു വിഭാഗത്തെയെടുത്താലും ഏറ്റവും കൌതുകമുണര്ത്തുന്നവരും ഓമനത്തമുള്ളവരും കുഞ്ഞുങ്ങളാണ്. സ്വയം സംരക്ഷിക്കാന് കഴിവില്ലാത്ത കുരുന്നുകള്ക്ക് പ്രകൃതി അറിഞ്ഞുനല്കിയ വരമാണീ ഓമനത്തം! മറ്റുള്ളവരുടെ ശ്രദ്ധയും വാത്സല്യവും പരിചരണവും അതവര്ക്കുറപ്പുനല്കുന്നു. എന്നാലിതിന്റെ ഇരുണ്ട മറുവശമാണ് ലോകമെമ്പാടുമുള്ള ശിശുപീഡകരിലൂടെ നാം കണ്ടുകൊണ്ടിരിക്കുന്നത്. അസ്വസ്ഥതാജനകമാം വിധം വര്ദ്ധിച്ചുകൊണ്ടിരിക്കുന്ന ബാലലൈംഗികത്തൊഴിലാളികളും കുട്ടികളെ ഉള്പ്പെടുത്തിയുള്ള അശ്ലീലദൃശ്യപ്രചാരണങ്ങളും മനുഷ്യക്കടത്തലുകളുമെല്ലാം വിരല് ചൂണ്ടുന്നതും ഈ പ്രശ്നത്തിലേക്കു തന്നെയാണ്.
എത്ര വയസ്സുമുതൽ എത്ര വയസ്സുവരെ?
പതിനാറു വയസ്സില് കൂടുതല് പ്രായമുള്ളവരിലാണ് സാധാരണ ഈ രോഗം പരിഗണിക്കാറുള്ളത്. എന്നാല് തങ്ങളേക്കാള് അഞ്ചു വയസ്സെങ്കിലും കുറവുള്ള കുട്ടികളോടു ലൈംഗികതല്പരത കാണിക്കുന്ന കൌമാരക്കാരുടേയും പ്രശ്നം പീഡോഫീലിയ തന്നെയാകാം. യാതൊരു വിധ കുറ്റബോധമോ നാണക്കേടോ ഉത്കണ്ഠയോ ഇതു മൂലം അനുഭവപ്പെടാത്തവരെയും, ഇത്തരം ത്വരകളുടെ പ്രഭാവത്തില് ഒരിക്കല് പോലും കുറ്റകൃത്യങ്ങളിലേര്പ്പെടാത്തവരെയും, പ്രശ്നങ്ങളിലൊന്നും ചെന്നുചാടാതെ സ്വന്തം പ്രവര്ത്തനമേഖലയില് സുഗമമായി മുന്നോട്ടു പോകാനാകുന്നവരുമായവരെയും പീഡോഫിലിയ രോഗികളായല്ല മറിച്ചു പീഡോഫിലിക് വാഞ്ഞ്ഛയുള്ള വ്യക്തിത്വങ്ങളായാണു വൈദ്യശാസ്ത്രം കണക്കാക്കാറുള്ളത്.
ഈ പറഞ്ഞ ഇരുകൂട്ടരിലും ആണ്കുട്ടികളോടു മാത്രമോ പെണ്കുട്ടികളോടു മാത്രമോ താല്പര്യം കാണിക്കുന്നവരും, കുട്ടികളോടും മുതിര്ന്നവരോടും തുല്യ ആസക്തിയുള്ളവരുമുണ്ടാകാം. കുടുംബാംഗങ്ങളായ കുട്ടികളോടു മാത്രം ലൈംഗികതാല്പര്യം കാണിക്കുന്ന ഒരു വിഭാഗവുമുണ്ട്. ചിലര് തങ്ങളുടെ ഈ സമാന്തരതാല്പര്യങ്ങളെ തുറന്നു സമ്മതിക്കുമെങ്കില് മറ്റുചിലര് തെളിവോടെ പറഞ്ഞു മനസ്സിലാക്കിയാല് പോലും കാര്യം നിഷേധിക്കുന്നവരാകാം.
എല്ലാവരും കുട്ടികളെ ലൈംഗികമായി പീഡിപ്പിക്കാറില്ല
എല്ലാ ശിശുപ്രേമികളും കുട്ടികളെ ലൈംഗികമായി പീഡിപ്പിക്കാറില്ല എന്നതൊരു അതിശയോക്തിയായി തോന്നിയേക്കാം. അതായത്, ശിശുപ്രേമികളില് ശിശുപീഡകരും അങ്ങിനെയല്ലാത്തവരുമുണ്ട്. പൊതുവെ നാമറിയുന്നത് ആദ്യവിഭാഗക്കാരെപ്പറ്റി മാത്രമാണ്. എന്നാല് ശാസ്ത്രം പറയുന്നു, രണ്ടാമത്തെ വിഭാഗവും പരോക്ഷമായ രീതിയില് കുഞ്ഞുജീവിതങ്ങളെ താറുമാറാക്കിക്കൊണ്ടിരിക്കുകയാണെന്ന്!കുഞ്ഞുങ്ങളെ നേരിട്ടുപയോഗിക്കാത്ത ഇവരില് വലിയൊരു ശതമാനമാണ് ചൈല്ഡ് പോര്ണോഗ്രാഫിയുടെ സജീവപ്രേക്ഷകര്. കുഞ്ഞുങ്ങളുടെ അശ്ലീലദൃശ്യങ്ങളോടുള്ള തീവ്രമായ അടിമത്തം ഇവരുടെ പ്രത്യേകതയാണ്.
അശ്ലീലഛായാഗ്രഹണത്തിന്റെയും തദ്വാരാ ലൈംഗികത്തൊഴിലിന്റെയും ലോകത്തേക്ക് ഏതൊക്കെയോ കുഞ്ഞുങ്ങളെ പരോക്ഷമായി വലിച്ചിഴക്കുകയാണ് ഇത്തരം ‘ഉപഭോക്താക്കള്’!കുഞ്ഞുങ്ങളെ ചിത്രീകരിക്കുന്ന ലക്ഷോപലക്ഷം അശ്ലീലസൈറ്റുകളും അവയുടെ ഇരുപതിനായിരം കോടിയില്പരം വരുന്ന ആസ്തിയും കൈചൂണ്ടുന്നത് പീഡോഫീലിയ എന്ന സമസ്യയുടെ ഇത്തരം വിഷമവശങ്ങളിലേക്ക് തന്നെയാണ്. അംഗീകരിക്കാന് വിഷമം തോന്നുമെങ്കിലും,പുറംലോകമറിയാതെ ഒരുപാടുപേര് നമുക്കുചുറ്റും ഈ പ്രശ്നവുമായി നടപ്പുണ്ട് എന്നത് തന്നെയാണ് വസ്തുത!
ഗവേഷണഫലങ്ങളരക്കിട്ടുറപ്പിച്ച ചില വസ്തുതകളറിയാം. അതിങ്ങനെയാണ് –
★പീഡോഫീലിയ ഒരു ആജീവനാന്ത അവസ്ഥയാണ്.
★അതിന്റെ ലക്ഷണങ്ങള്ക്ക് ജീവിതത്തിന്റെ വിവിധഘട്ടങ്ങളില് ഏറ്റക്കുറച്ചില് വരാം.
★പ്രായമേറും തോറും ഇത്തരം ലൈംഗികതാല്പര്യങ്ങള് കുറഞ്ഞുവരുന്നതായാണ് പൊതുവെ കാണുന്നത്.
★വലിയൊരു ശതമാനത്തിനും ഒപ്പം മറ്റേതെങ്കിലും മാനസീകരോഗങ്ങള് കൂടി കാണാം.
★ആന്റിസോഷ്യല് പേഴ്സണാലിറ്റി ഡിസോര്ഡര് പോലുള്ള വ്യക്തിത്വവൈകല്യങ്ങളും ഇത്തരക്കാരില് ചിലര്ക്കെങ്കിലുമുണ്ടാകാം
★ബാല്യത്തില് ലൈംഗികപീഡനത്തിനിരയായവരില് ഈയവസ്ഥ കൂടുതലായി കണ്ടുവരുന്നുണ്ട്.
★ഗര്ഭാവസ്ഥയില് നേരിടേണ്ടി വന്നിട്ടുള്ള വിവിധ രോഗങ്ങള് പീഡോഫീലിയയ്ക്കു വഴി തെളിക്കാം
★അമിതമായ ലൈംഗികത്വര, തീവ്രമായ കുറ്റബോധം എന്നിങ്ങനെ ഇത്തരക്കാരില് കണ്ടുവരുന്ന ചില പ്രശ്നങ്ങള് ചിലപ്പോള് മനശ്ശാസ്ത്രചികിത്സയിലൂടെ മെച്ചപ്പെട്ടേക്കാം
കരയുന്ന കുഞ്ഞുമുഖങ്ങള്…
കുട്ടിയെ അശ്ലീലദൃശ്യങ്ങള് കാണിക്കുന്നതും കുട്ടിയുടെ അശ്ലീലചിത്രങ്ങളും വീഡിയോകളുമെടുക്കുന്നതും സമ്മതമില്ലാതെ ശരീരത്തില് സ്പര്ശിക്കുന്നതും മുതല് ലൈംഗികവേഴ്ച വരെയുള്ള എന്തു പ്രവൃത്തിയും പീഡനത്തിലുള്പ്പെടുന്നു. എങ്ങനെയാണീ ശിശുപീഡകര് കുട്ടികളെ വേട്ടയാടുന്നത്?യഥാര്ത്ഥ ജീവിതത്തിലായാലും,സൈബര് ലോകത്തായാലും ‘child grooming’ എന്നറിയപ്പെടുന്ന ശ്രമമേറിയ നീണ്ട മുന്നൊരുക്കനാടകത്തിന്റെ പരിസമാപ്തി മാത്രമായിരിക്കും പലപ്പോഴും ലോകമറിയുന്നത്. അധികപങ്ക് പീഡോഫിലിയ ബാധിതരും സൂക്ഷ്മമായി ആസൂത്രണം ചെയ്താണ് തങ്ങളുടെ ഇരകളെ തിരഞ്ഞെടുത്തു വശത്താക്കുന്നത്. കുട്ടികളെ തന്ത്രപൂര്വ്വം പരിചയപ്പെടുകയും അവരുമായി സൗഹൃദം വളര്ത്തുകയും,അവരുടെ കുടുംബാംഗങ്ങളുടെ വരെ വിശ്വാസമാര്ജ്ജിക്കുകയും ഇത്തരക്കാര് ചെയ്യുന്നു. മിക്കപ്പോഴും കുട്ടിയോട് അധികാരത്തോടെ പെരുമാറാവുന്ന പരിചയക്കാരോ ബന്ധുക്കളോ തന്നെയായിരിക്കാം പീഡകര്.
കുട്ടി പരാതി പറഞ്ഞാല് പോലും അതുവിശ്വസിക്കാന് മുതിര്ന്നവര് മടിക്കുന്നത്ര വിദഗ്ദ്ധമായായിരിക്കും പലപ്പോഴും ഇവരുടെ മുന്നൊരുക്കങ്ങള്. വേണ്ടത്ര പരിഗണനയോ വാത്സല്യമോ കിട്ടാത്ത, പ്രശ്നങ്ങള് നിറഞ്ഞ കുടുംബങ്ങളില് നിന്നുള്ളവരോ ശാന്തസ്വഭാവികളോ നല്ല അനുസരണ ശീലമുള്ളവരോ ആയ കുട്ടികളെയാണ് പലപ്പോഴും ഇക്കൂട്ടര് ഉന്നം വയ്ക്കാറുള്ളത്. സാഹചര്യങ്ങള് ഒത്തുവരുമ്പോള് പ്രലോഭനമോ ഭീഷണിയോ ബ്ലാക്ക് മെയിലിംഗോ വഴി കുട്ടിയെ ഉപയോഗപ്പെടുത്തുന്നു; ചെറുത്തു നില്ക്കാനാകാത്ത വിധം കുട്ടി വലയില്കുരുങ്ങാനും അതുകൊണ്ടു തന്നെ പീഡനങ്ങള് ആവര്ത്തിച്ചുകൊണ്ടിരിക്കാനും ഇടവരികയും ചെയ്യുന്നു. പലപ്പോഴും ഒന്നിലധികം തവണ പീഡനം നടന്ന ശേഷമാകാം വിവരങ്ങള് പുറത്തറിയുന്നതുതന്നെ.
പീഡനവിധേയരായവരെ എങ്ങനെ തിരിച്ചറിയാം?
★പ്രായത്തിനുമപ്പുറത്തുള്ള ലൈംഗികപരിജ്ഞാനം
★സംസാരത്തിലും പെരുമാറ്റത്തിലും വരയ്ക്കുന്ന ചിത്രങ്ങളിലുമെല്ലാം സെക്സിനെക്കുറിച്ചുള്ള സൂചനകള്
★കളിപ്പാട്ടങ്ങളും മറ്റും കൊണ്ടു ജനനേന്ദ്രിയങ്ങള് കൈകാര്യം ചെയ്യാനുള്ള ശ്രമങ്ങള്
★മറ്റുകുട്ടികള്ക്കു നേരെ നടത്തുന്ന ലൈംഗികചേഷ്ടകളും അനുബന്ധപ്രവൃത്തികളും.
★പൊതുഇടങ്ങളില് സ്വയംഭോഗത്തിനു മുതിരുക
★ലൈംഗികാവയവങ്ങളില് വേദന, ചൊറിച്ചില്, നിറം മാറ്റം, രക്തസ്രാവം തുടങ്ങിയവ.
★വിശപ്പില്ലായ്മ, ഭക്ഷണം വിഴുങ്ങാനുള്ള ബുദ്ധിമുട്ട്, സ്വയം മുറിവുകളേല്പ്പിക്കാനും അംഗഭംഗപ്പെടുത്താനുമുള്ള പ്രവണത
★അപ്രതീക്ഷിത ഭാവമാറ്റങ്ങള് ഉദാ: ഭയവും പെട്ടെന്നുള്ള ദേഷ്യവും അനിയന്ത്രിതമായകരച്ചിലും, അക്രമസ്വഭാവവും, ഉള്വലിയലും.
★പ്രത്യക്ഷകാരണങ്ങളൊന്നും കൂടാതെ ചില ആളുകളെയോ സ്ഥലങ്ങളെയോ പ്രവര്ത്തികളെയോ ഒഴിവാക്കുവാനോ അകറ്റിനിര്ത്താനോ ശ്രമിക്കുന്നത്
★പതിവില്ലാതെ തന്നെക്കാള് പ്രായം കുറഞ്ഞ കുട്ടികളെപ്പോലെ പെരുമാറുന്നത്.
★കുട്ടിയുടെ കൈവശം എവിടുന്നെന്നു വ്യക്തമാകാത്ത വിധം പണം കാണപ്പെടുന്നത്.
ഭാവിയിലവര്ക്കെന്തു സംഭവിക്കാം?
ലൈംഗികപീഡനത്തിനിരകളാകുന്ന കുട്ടികളിലധികവും ചിരസ്ഥായിയായ വൈകാരികപ്രശ്നങ്ങള് പ്രകടിപ്പിക്കുന്നതായാണ് പഠനങ്ങള് കാണിക്കുന്നത്. ക്രിമിനല് ചായ് വുകളും അനുചിതലൈംഗിക താല്പര്യങ്ങളും അക്രമസ്വഭാവങ്ങളും പ്രായോചിതമാല്ലാത്ത പെരുമാറ്റരിതികളും അവരില് കണ്ടു വരുന്നു. ആത്മനിന്ദ, ആത്മവിശ്വാസക്കുറവ്, ആത്മഹത്യാപ്രവണത, വിഷാദം, ഉത്കണ്ഠ, ലഹരിയുപയോഗം, നിദ്രാരോഗങ്ങള്, ഭക്ഷണശീലപ്രശ്നങ്ങള്, മനക്ലേശം മൂലമുളവാകുന്ന വ്യക്തമായ രോഗകാരണം കണ്ടെത്താനാവാത്ത ശാരീരികാസ്വാസ്ഥ്യങ്ങള് (psychosomatic disorders), പഠനത്തില് പുറകോട്ടു പോകല് എന്നിങ്ങനെ കുട്ടികള്ക്കുണ്ടാകാനിടയുള്ള പ്രശ്നങ്ങളേറെയാണ്
മുതിര്ന്നു കഴിഞ്ഞാലാകട്ടെ ലൈംഗിക അസ്വാസ്ഥ്യങ്ങളും ദാമ്പത്യതകര്ച്ചയും പങ്കാളിയെ ശാരീരികവും മാനസീകവുമായി പീഡിപ്പിക്കാനുള്ള പ്രവണതയും ദൃഡബന്ധങ്ങള് നിലനിര്ത്താനും നല്ലൊരു രക്ഷാകര്ത്താവായിരിക്കാനുമുള്ള കഴിവില്ലായ്മയുമെല്ലാം ഇവരില് പ്രത്യക്ഷമാകാം.ചിലരെങ്കിലും വീണ്ടും ഇത്തരം പീഡനാനുഭവങ്ങള്ക്കുള്ള വിധേയത്വമനോഭാവവും പ്രകടിപ്പിക്കാം. കുട്ടിയായിരിക്കുമ്പോള് ലൈംഗികപീഡനത്തിനിരയായവര്ക്ക് മാനസീകരോഗങ്ങളുണ്ടാകാനുള്ള സാധ്യത കൂടുതലാണ്. യൂനിസെഫ് പറയുന്നത്, ഇത്തരമനുഭവങ്ങളുടെ അനുരണനങ്ങളായിരിക്കും കൌമാരക്കാര്ക്കിടയില് വര്ദ്ധിച്ചു വരുന്ന ആത്മഹത്യാ പ്രവണതയുടെ നല്ലൊരു ശതമാനവുമെന്നാണ്.
മാതാപിതാക്കള്ക്കെടുക്കാവുന്ന മുന്കരുതലുകള്….
★ശരീരാവയവങ്ങളുടെ പേര് പറയാന് പഠിപ്പിക്കുമ്പോള് തന്നെ ജനനേന്ദ്രിയങ്ങളുടെ യഥാര്ത്ഥ പേരുകള് ഒഴിവാക്കാതിരിക്കുക. ഇത് അവയുമായി ബന്ധപ്പെട്ട പ്രശ്നങ്ങള് മടികൂടാതെ തുറന്നു പറയാനാവാന് ഒരുപരിധി വരെ സഹായിക്കും.
★ശരീരഭാഗങ്ങളുടെ സ്വകാര്യതയെ കുറിച്ചും സമ്മതമില്ലാതെ തങ്ങളെ സ്പര്ശിക്കാനാര്ക്കും അവകാശമില്ല എന്നതിനെക്കുറിച്ചും ചെറുപ്രായത്തിലേ കുട്ടികളെ പഠിപ്പിക്കുക.
★അച്ഛനമ്മമാര്ക്കും കുട്ടികള്ക്കുമിടയില് രഹസ്യങ്ങളില്ലെന്നു കുഞ്ഞിലേ പറഞ്ഞുമനസ്സിലാക്കുക. ഇത് പ്രശ്നങ്ങള് ചര്ച്ച ചെയ്യാനവര്ക്കു താല്പര്യമുണ്ടാക്കും.
★മാതാപിതാക്കള്ക്കു പ്രവേശനമുള്ള ഡേ കെയര് സെന്ററുകളും നഴ്സറികളും തിരഞ്ഞെടുക്കുക.
★കുട്ടികള്ക്ക് കൂടെക്കൂടെ സമ്മാനങ്ങളും മറ്റും നല്കുന്നവരും അവരെ തനിയെ പുറത്തു കൊണ്ടുപോകാന് താല്പര്യപ്പെടുന്നവരുമായ മുതിര്ന്നവരെ ശ്രദ്ധയോടെ നിരീക്ഷിക്കുക
★കുട്ടിയുടെ ചിത്രങ്ങളെടുക്കാന് അന്യരെ അനുവദിക്കാതിരിക്കുക
★കുട്ടിയെ മുതിര്ന്നവരുടെ സാന്നിധ്യത്തില് മാത്രം കമ്പ്യൂട്ടറുപയോഗിക്കാന് അനുവദിക്കുക
★വീട്ടിലെ അന്തരീക്ഷം മുതിര്ന്ന കുട്ടികള്ക്ക് ലൈംഗികതയെക്കുറിച്ചുള്ള അറിവുകള് പങ്കു വയ്ക്കാനും തെറ്റായ ധാരണകളെ തിരുത്താനുമുതകുന്നതാകണം.
★പീഡനങ്ങളെപ്പറ്റിയുള്ള പത്രവാര്ത്തകള് ഇത്തരം ചര്ച്ചകള്ക്കുള്ള ഒരുപാധിയായെടുത്ത് കാര്യങ്ങള് തുറന്നു പറയേണ്ടതിന്റെ പ്രാധാന്യം അവരെ ബോദ്ധ്യപ്പെടുത്തുക.
പീഡനമുണ്ടായാല് എന്തുചെയ്യും…
പീഡനമുണ്ടായതായി കുട്ടികള് വെളിപ്പെടുത്തിയാല് സമചിത്തതയോടെ അവര്ക്കു പറയാനുള്ളത് കേള്ക്കുകയും അവരെ വൈകാരികമായി പിന്തുണയ്ക്കുകയും വൈകാതെ വൈദ്യപരിശോധനയ്ക്കു വിധേയരാക്കുകയും ചെയ്യണം. കുഞ്ഞിനെ കുറ്റപ്പെടുത്താതിരിക്കാനും, ധൈര്യം പകരാനും സംഭവിച്ചതിന്റെ ഉത്തരവാദിത്തം ഇത്തിരിപോലും അവരുടേതല്ലെന്നും ഇങ്ങനെയൊക്കെപ്പറ്റിയത് അവരുടെ പിഴവുകൊണ്ടല്ലെന്നും ബോധ്യപ്പെടുത്താനും ശ്രദ്ധിക്കണം. ആവശ്യമെങ്കില് മടികൂടാതെ മാനസികാരോഗ്യപ്രവര്ത്തകരുടെ സഹായം സ്വീകരിക്കുക. സംഭവം പോലിസിലറിയിക്കുന്നതിനും നിയമനടപടികള് സ്വീകരിക്കുന്നതിനും അലംഭാവം കാണിക്കരുത്.
ആ നിമിഷത്തെ അഭിമാന സംരക്ഷണത്തിനു വേണ്ടി പീഡനം നടന്നില്ലെന്നു നടിക്കുന്നതും കുട്ടിയുടെ വാക്കുകളെ മുഖവിലയ്ക്കെടുക്കാതിരിക്കുന്നതും ഒന്നും സംഭവിക്കാത്ത മട്ടില് പരിചയക്കാരായ പീഡകരോട് പെരുമാറുന്നതുമെല്ലാം ദോഷഫലങ്ങളേ ഉളവാക്കൂ. കുട്ടിക്ക് രക്ഷാകര്ത്താവിനോടും സമൂഹത്തോടുമുള്ള വിശ്വാസ്യത നഷ്ടപ്പെടാനും പീഡനങ്ങള് ആവര്ത്തിക്കപ്പെടാനും അങ്ങനെ സംഭവിച്ചാല് അവഗണന മുന്കണ്ട് കുഞ്ഞത് മറച്ചുവയ്ക്കാനും മാത്രമേ ഇത്തരം മനോഭാവങ്ങള് വഴിയൊരുക്കൂ.
കാരണം തേടുമ്പോള്…..
എന്തായിരിക്കാം ഈ ശിശുപ്രേമികളുടെ തലച്ചോറിനകത്ത് നടക്കുന്നത്? വൈദ്യശാസ്ത്രത്തിനിനിയും പൂര്ണവ്യക്തത കൈവന്നിട്ടില്ലാത്ത ഒരു മേഖലയാണത്. മാഗ്നെറ്റിക് റെസോണന്സ് ഇമേജിംഗ്(MRI) പഠനങ്ങള് വ്യക്തമാക്കുന്നത് സാമൂഹ്യചോദനകളെ നിയന്ത്രിക്കുന്ന മസ്തിഷ്കഭാഗങ്ങള് മറ്റുള്ളവരുടേതില് നിന്നും വ്യത്യസ്ഥമാണിവരിലെന്നാണ്. പ്രായ, ലിംഗ, സ്ഥാനവ്യത്യാസങ്ങളനുസരിച്ച് മറ്റുള്ളവരോടു പെരുമാറാനുള്ള ശേഷി നമുക്കു നല്കുന്ന നാഡീശൃംഖലകളുടെ വിനിമയശേഷിയിലുണ്ടാകുന്ന പ്രശ്നങ്ങളും ഈ അവസ്ഥക്കുപുറകിലുണ്ട്.
കഷ്ടപ്പെടുന്നവരെ കാണുമ്പോള് അനുകമ്പയും, ദുഷ്ടരെ കാണുമ്പോള് വെറുപ്പും ദേഷ്യവും, ഇണയെ കാണുമ്പോള് കാമവും സ്ഥലകാലബോധത്തോടെ മനസ്സിലുണരുന്നത് ഈ നാഡീശൃംഖലകളുടെ താളനിബദ്ധമായ പ്രവര്ത്തനങ്ങള് മൂലമാണ്.അവയിലുണ്ടാകുന്ന തകരാറുകളാണ് കുഞ്ഞുങ്ങളെ കാണുമ്പോള് സാധാരണക്കാരിലുണരുന്ന സ്നേഹവാത്സല്യങ്ങള്ക്കു പകരം പീഡോഫീലിയാബാധിതര്ക്ക് ലൈംഗിക ഉണര്വ് അനുഭവപ്പെടുത്തുന്നത്.