Web Desk
തലശ്ശേരിയില് ജില്ലാ ഭരണകൂടം നിരോധനാജ്ഞ പ്രഖ്യാപിച്ചു. തലശ്ശേരി പൊലീസ് സ്റ്റേഷന് പരിധിയിലാണ് നിരോധനാജ്ഞ പ്രഖ്യാപിച്ചിരിക്കുന്നത്. ആളുകള് കൂട്ടം കൂടുന്നതിനും യോഗങ്ങള് സംഘടിപ്പിക്കുന്നതിനും വിലക്കുണ്ട്. വെള്ളിയാഴ്ച മുതല് ഡിസംബര് ആറാം തിയതി വരെയാണ് നിരോധനാജ്ഞ. കഴിഞ്ഞ ദിവസം തലശ്ശേരിയില് ജയകൃഷ്ണന് മാസ്റ്റര് അനുസ്മരണ പരിപാടിക്കിടെ ബി.ജെ.പി പ്രവര്ത്തകര് വിദ്വേഷ മുദ്രവാക്യങ്ങളുയര്ത്തിയിരുന്നു. ഇതിന്റെ പശ്ചാത്തലത്തിലാണ് നിരോധനാജ്ഞ പ്രഖ്യാപിച്ചിരിക്കുന്നത്.
സംഭവത്തില് കണ്ടാലറിയാവുന്ന 25 ബി.ജെ.പി പ്രവര്ത്തകര്ക്കെതിരെ പൊലീസ് കേസ് രജിസ്റ്റര് ചെയ്തിട്ടുണ്ട് .യുവമോര്ച്ച കണ്ണൂര് ജില്ലാ കമ്മിറ്റിയായിരുന്നു റാലി സംഘടിപ്പിച്ചത്. ബി.ജെ.പി സംസ്ഥാന ജനറല് സെക്രട്ടറി കെ. രഞ്ജിത്ത്, കെ.പി. സദാനന്ദന്, സംസ്ഥാന വക്താവ് സന്ദീപ് വചസ്പതി തുടങ്ങിയ നേതാക്കളായിരുന്നു ജാഥയ്ക്ക് നേതൃത്വം നല്കിയിരുന്നത്.