newsdesk
തോട്ടുമുക്കം: തോട്ടുമുക്കം സെന്റ് തോമസ് ഹയർ സെക്കൻഡറി സ്കൂൾ സംഘടിപ്പിച്ച ‘സ്പെക്ട്രം 26’ എക്സിബിഷൻ വിദ്യാർത്ഥികൾക്കും നാട്ടുകാർക്കും അറിവും കൗതുകവും പകരുന്ന അനുഭവമായി. വിപുലമായ രീതിയിൽ ഒരുക്കിയ എക്സിബിഷനിൽ ഐ.എസ്.ആർ.ഒയുടെ (ISRO) ‘സ്പേസ് ഓൺ വീൽസ്’ സഞ്ചരിക്കുന്ന ബഹിരാകാശ പ്രദർശനം പ്രേക്ഷകരുടെ പ്രത്യേക ശ്രദ്ധ പിടിച്ചുപറ്റി.
പ്രത്യേകം സജ്ജീകരിച്ച ബസ്സിൽ ഒരുക്കിയ ‘സ്പേസ് ഓൺ വീൽസ്’ ശാസ്ത്രലോകത്തെ അടുത്തറിയാനും വിജ്ഞാനം പങ്കുവെക്കാനും ഏറെ ഉപകാരപ്പെട്ടു. ഇന്ത്യയുടെ ബഹിരാകാശ നേട്ടങ്ങളായ ചന്ദ്രയാൻ, മംഗൾയാൻ, പി.എസ്.എൽ.വി, ജി.എസ്.എൽ.വി റോക്കറ്റുകൾ, വിവിധ ഉപഗ്രഹങ്ങൾ എന്നിവയുടെ മാതൃകകളും ഡിജിറ്റൽ വിശദീകരണങ്ങളും കുട്ടികളിൽ ഏറെ കൗതുകമുണർത്തി. ശാസ്ത്ര കൗതുകത്തോടൊപ്പം ബഹിരാകാശ ഗവേഷണ ചരിത്രവും ലളിതമായി മനസ്സിലാക്കാൻ ഈ പ്രഥമ പ്രദർശനം വലിയ അവസരമാണ് ഒരുക്കിയത്.
എക്സിബിഷനോടനുബന്ധിച്ച് ഒരുക്കിയ വിവിധ സ്റ്റാളുകളും ജനശ്രദ്ധ നേടി. ബിജില ഹുസൈന്റെ കലാസൃഷ്ടികൾ ഉൾപ്പെടുത്തിയ ബോട്ടിൽ ആൻഡ് പേപ്പർ ആർട്ട് എക്സിബിഷൻ, ഭാസ്കരൻ തോട്ടുമുക്കത്തിന്റെ മനോഹരമായ കരകൗശല വസ്തുക്കളുടെ സ്റ്റാൾ, കുര്യൻ പനംപിലാവ് ഒരുക്കിയ ഫോട്ടോ എക്സിബിഷൻ എന്നിവ സന്ദർശകർക്ക് വേറിട്ട അനുഭവമായി.
ഇതിനുപുറമെ വിദ്യാർത്ഥികൾക്കും നാട്ടുകാർക്കുമായി കെ.എം.സി.ടി (KMCT) മെഡിക്കൽ കോളേജിന്റെ നേതൃത്വത്തിൽ അടിയന്തര ഘട്ടങ്ങളിൽ ഉപയോഗപ്രദമാകുന്ന ഫസ്റ്റ് എയ്ഡ് പരിശീലന ക്ലാസും സംഘടിപ്പിച്ചിരുന്നു.
സ്കൂൾ മാനേജർ ഫാദർ ബെന്നി കാരക്കാട്ട് അധ്യക്ഷൻ ആയ ചടങ്ങ് ബ്ളോക് മെമ്പർ ധന്യ ഉദ്‌ഘാടനം ചെയ്തു .വാർഡ് മെമ്പർമാരായ സുഹാസ് പികെ ,സന്തോഷ് സെബാസ്റ്റ്യൻ ,ഹൈസ്കൂൾ പ്രധാനാധ്യാപിക സിസി മാനുവൽ ,ഹയർസെക്കന്ഡറി പ്രിൻസിപ്പൽ ആന്റപ്പൻ ചെറിയാൻ ,പി ടി എ പ്രസിഡന്റ് ജോസ് പി ഡി ,എം പി ടി എ പ്രസിഡന്റ് ബിന്ദു ജോൺസൻ തുടങ്ങിയർ ചടങ്ങിൽ സംബന്ധിച്ചു .
വൈവിധ്യമാർന്ന സ്റ്റാളുകളും പ്രദർശനങ്ങളും കൊണ്ട് സമ്പന്നമായ ‘സ്പെക്ട്രം 26’ നാട്ടുകാർക്കും വിദ്യാർത്ഥികൾക്കും ഒരുപോലെ ഉപകാരപ്രദവും ജനപങ്കാളിത്തം കൊണ്ട് ശ്രദ്ധേയവുമായി മാറി.