newsdesk
തോട്ടുമുക്കം: റോഡിന്റെ ദാരുണമായ ശോച്യാവസ്ഥയിൽ പ്രതിഷേധിച്ച് തോട്ടുമുക്കം-പുതിയിനയിടം റോഡിൽ നാട്ടുകാർ ടിപ്പർ ലോറികൾ തടഞ്ഞു. ഇന്ന് രാവിലെ മുതലാണ് പ്രദേശവാസികൾ സംഘടിച്ച് അനിശ്ചിതകാല സമരം ആരംഭിച്ചത്.
വർഷങ്ങളായി തകർന്നു കിടക്കുന്ന റോഡിലൂടെയുള്ള ടിപ്പറുകളുടെ അനിയന്ത്രിതമായ സർവീസ് കാരണം യാത്രക്കാരും പ്രദേശവാസികളും കടുത്ത ദുരിതത്തിലാണ്. മഴക്കാലത്ത് റോഡ് വലിയ കുഴികളായി മാറി അപകടക്കെണിയാവുകയും, വേനൽക്കാലത്ത് അസഹനീയമായ പൊടിശല്യം അനുഭവപ്പെടുകയും ചെയ്യുന്നു. പൊടിപടലങ്ങൾ കാരണം പ്രദേശവാസികളിൽ പലർക്കും ആസ്ത്മ ഉൾപ്പെടെയുള്ള ഗുരുതരമായ ശ്വാസകോശ രോഗങ്ങളും മറ്റ് ആരോഗ്യപ്രശ്നങ്ങളും പിടിപെട്ടിട്ടുണ്ട്. കിടപ്പുരോഗികൾക്കും പ്രായമായവർക്കും ഈ വഴി യാത്ര ചെയ്യാൻ പോലും കഴിയാത്ത അവസ്ഥയാണെന്ന് നാട്ടുകാർ ആരോപിക്കുന്നു.
റോഡിന്റെ അറ്റകുറ്റപ്പണികളും പുനരുദ്ധാരണ പ്രവൃത്തികളും പൂർത്തിയാക്കുന്നതുവരെ ഇനി ഇതിലേ ടിപ്പർ ലോറികൾ കടത്തിവിടില്ലെന്ന ഉറച്ച നിലപാടിലാണ് നാട്ടുകാർ. അധികൃതരുടെ ഭാഗത്തുനിന്ന് ശാശ്വതമായ പരിഹാരം ഉണ്ടാകുന്നതുവരെ സമരം തുടരാനാണ് സമരസമിതിയുടെ തീരുമാനം.