Entertainment Desk
രതീഷ് ബാലകൃഷ്ണ പൊതുവാള് തിരക്കഥയെഴുതി സംവിധാനം ചെയ്ത കനകം കാമിനി കലഹം(ക.കാ.ക.) എന്ന സിനിമയാണ് ഡിസ്നി+ഹോട്ട്സ്റ്റാറിലൂടെ റിലീസിനൊരുങ്ങുന്ന ആദ്യ മലയാളം സിനിമ. നിവിന് പോളി, ഗ്രേസ് ആന്റണി, വിനയ് ഫോര്ട്ട് എന്നിവര് പ്രധാന വേഷത്തിലഭിനയിച്ച് നിവിന് പോളിയുടെ സ്വന്തം ബാനറായ പോളി ജൂനിയര് പിക്ചേഴ്സ് നിര്മിച്ച ചിത്രമാണ് കനകം കാമിനി കലഹം.
ഒക്ടോബര് 15 നാണ് സോഷ്യല് മീഡിയയിലൂടെ ചിത്രത്തിന്റെ പോസ്റ്റര് പുറത്തുവിട്ടത്. ചിത്രത്തിന്റെ റിലീസ് തീയതി ഇതുവരെ പ്രഖ്യാപിച്ചിട്ടില്ല. ട്രെയിലറും റിലീസും പിന്നിട് പ്രഖ്യാപിക്കുമെന്നാണ് വിവരം. മലയാളികള് കാണാന് ഇഷ്ടപ്പെടുന്ന നര്മവും അല്പം സസ്പെന്സും ഉള്പ്പെടുത്തിയാണ് കനകം കാമിനി കലഹം ഒരുക്കിയിരിക്കുന്നതെന്ന് സംവിധായകന് രതീഷ് ബാലകൃഷ്ണ പൊതുവാള് പറഞ്ഞു. കോമഡിയ്ക്ക് പ്രാധാന്യം നല്കുന്നതോടൊപ്പം തന്നെ നിരവധി ട്വിസ്റ്റുകള് കൂടിയുള്ള സിനിമയായിരിക്കും ഇതെന്നും ഇതുവരെ കാണാത്ത കാഴ്ചകളായിരിക്കും ചിത്രം സമ്മാനിക്കുകയെന്നും രതീഷ് ബാലകൃഷ്ണ പൊതുവാള് കൂട്ടിച്ചേര്ത്തു.