newsdesk
നാളികേര കൃഷിയിൽ വിപ്ലവകരമായ മാറ്റങ്ങൾ കൊണ്ടുവന്ന ഒന്നാണ് ശ്രീലങ്കൻ ഹൈബ്രിഡ് തെങ്ങിനങ്ങൾ. ലോകത്തിലെ തന്നെ പ്രധാന നാളികേര ഉൽപാദന രാജ്യങ്ങളിലൊന്നായ ശ്രീലങ്കയിൽ നിന്ന് വികസിപ്പിച്ചെടുത്ത ഈ ഇനങ്ങൾ ഇന്ന് കേരളത്തിലും വലിയ പ്രചാരം നേടിക്കൊണ്ടിരിക്കുകയാണ്. കുറഞ്ഞ കാലയളവിനുള്ളിലെ വിളവെടുപ്പും കൂടുതൽ കായലഭ്യതയുമാണ് ഇതിനെ കർഷകരുടെ പ്രിയപ്പെട്ടതാക്കുന്നത്.
ഹൈബ്രിഡ് തെങ്ങ് മൂന്ന് നാല് വർഷത്തിനകം കായ്ച്ചു തുടങ്ങും. കൃത്യമായ പരിചരണം ലഭിച്ചാൽ ഒരു കുലയില്തന്നെ 15 മുതൽ 30 തേങ്ങ വരെ കായ്ക്കാറുണ്ട്. പൊതിച്ച ഒരു തേങ്ങയ്ക്ക് ശരാശരി ഒരു കിലോ വരെ തൂക്കമുണ്ടാകും. കരിക്കിൽ ശരാശരി ഒരു ലീറ്ററോളം വെള്ളം കിട്ടും. ഉൾകട്ടിയുടെ കാര്യത്തിലും മികച്ചതാണ്. ഇതിനാൽ തന്നെ വെളിച്ചെണ്ണയും കാര്യമായി ലഭിക്കും.
എന്താണ് ശ്രീലങ്കൻ ഹൈബ്രിഡ് തെങ്ങുകൾ?
സാധാരണയായി ഉയരം കൂടിയ ഇനങ്ങളും (Tall varieties) ഉയരം കുറഞ്ഞ ഇനങ്ങളും (Dwarf varieties) തമ്മിൽ സങ്കരണം (Cross-breeding) നടത്തിയാണ് ഇത്തരം ഹൈബ്രിഡുകൾ വികിസിപ്പിച്ചെടുക്കുന്നത്. ശ്രീലങ്കൻ ലാൻഡ്റേസ് ഇനങ്ങളെ ( ശ്രീലങ്കൻ ടോൾ, കിങ് കോക്കനട്ട്) മാലദ്വീപ് ഡാർഫ് പോലെയുള്ള ഇനങ്ങളുമായി ചേർത്ത് പുതിയ മികച്ച ഇനങ്ങൾ രൂപപ്പെടുത്തിയെടുക്കുന്നു.
ഹൈബ്രിഡ് തെങ്ങിന്റെ ഗുണങ്ങൾ
പരമ്പരാഗത തെങ്ങിനങ്ങളെ അപേക്ഷിച്ച് ഹൈബ്രിഡ് തെങ്ങുകൾക്ക് ഒട്ടേറെ പ്രത്യേകതകളുണ്ട്. സാധാരണ തെങ്ങുകൾ കായ്ക്കാൻ 7 മുതൽ 10 വർഷം വരെ എടുക്കുമ്പോൾ, ഹൈബ്രിഡ് ഇനങ്ങൾ നട്ട് 3 മുതൽ 4 വർഷത്തിനുള്ളിൽ കായ്ച്ചു തുടങ്ങുന്നു. ഒരു തെങ്ങിൽ നിന്ന് വർഷത്തിൽ ശരാശരി 150 മുതൽ 250 വരെ നാളികേരം ലഭിക്കാറുണ്ട്. മികച്ച പരിചരണമുണ്ടെങ്കിൽ ഇത് 300 വരെ എത്തിയേക്കാം. ഇവ അധികം ഉയരത്തിൽ വളരാത്തതിനാൽ (സെമി-ഡാർഫ്) നാളികേരം ഇടുന്നതിനും കീടനാശിനികൾ തളിക്കുന്നതിനും എളുപ്പമാണ്. കൂമ്പ് മണ്ട കുരുത്തോല മധുരം കുറവാ യതിനാൽ കൊമ്പൻ ചെല്ലിയുടെയും ചെമ്പൻ ചെല്ലിയു ടെയും ആക്രമണം ധീരെ ഉണ്ടാകാറില്ല. നല്ല പ്രതിരോധ ശേഷിയുള്ള ഏറ്റവും മികച്ച ഹൈബ്രിഡ് വെറൈറ്റി തെങ്ങാണ് ശ്രീലങ്കൻ ഹൈബ്രിഡ് കോക്കനട്ട്. നാളികേരത്തിന്റെ വലുപ്പവും ഉള്ളിലെ കാമ്പിന്റെ കനവും കൂടുതലായതിനാൽ കൊപ്രയുടെയും എണ്ണയുടെയും ഉൽപാദനവും വർധിപ്പിക്കുന്നു.
കൃഷി ചെയ്യുന്ന രീതി
ഹൈബ്രിഡ് തെങ്ങുകൾക്ക് കൃത്യമായ പരിചരണവും ജലസേചനവും അത്യാവശ്യമാണ്. നല്ല സൂര്യപ്രകാശം ലഭിക്കുന്ന, വെള്ളക്കെട്ടില്ലാത്ത സ്ഥലമാണ് തെങ്ങ് കൃഷിക്ക് അനുയോജ്യം. ചരൽ കലർന്ന മണ്ണും ചെമ്മണ്ണും ഒരുപോലെ അനുയോജ്യമാണ്. 1 മീറ്റർ നീളം, വീതി, ആഴം എന്ന ക്രമത്തിൽ നടാനുള്ള കുഴികൾ എടുക്കണം. രണ്ട് തൈകൾ തമ്മിൽ കുറഞ്ഞത് 7.5 മീറ്റർ (25 അടി) എങ്കിലും അകലം ഉണ്ടായിരിക്കണം. കുഴിയിൽ ഉണങ്ങിയ ചാണകപ്പൊടി, വേപ്പിൻ പിണ്ണാക്ക്, എല്ലുപൊടി എന്നിവ മേൽമണ്ണുമായി ചേർത്ത് കുഴിയുടെ പകുതിയോളം നിറയ്ക്കാം. വേനൽക്കാലത്ത് കൃത്യമായി നനയ്ക്കേണ്ടത് അത്യാവശ്യമാണ്. തുള്ളിനന ആണ് ഏറ്റവും അനുയോജ്യം. തൈ വളരുന്നതിനനുസരിച്ച് തടത്തിൽ മണ്ണ് കയറ്റി കൊടുക്കുകയും കളകൾ നീക്കം ചെയ്യുകയും വേണം.
നാളികേരത്തിന്റെ വലുപ്പം
ശ്രീലങ്കൻ ഹൈബ്രിഡ് നാളികേരം സാധാരണ ഇനങ്ങളേക്കാൾ വലുതും ഭാരമുള്ളതുമാണ്. ഒരു നാളികേരത്തിൽ നിന്ന് ശരാശരി 500 മുതൽ 750 ഗ്രാം വരെ കൊപ്ര ലഭിക്കാറുണ്ട്. ഇളനീരിനായി ഉപയോഗിക്കുന്ന ഇനങ്ങളിൽ 750 മില്ലി മുതൽ 1 ലീറ്റർ വരെ വെള്ളം ഉണ്ടാകും. ശ്രീലങ്കൻ ഹൈബ്രിഡ് തൈകളുടെ വില നഴ്സറികളെയും തൈയുടെ പ്രായത്തെയും ആശ്രയിച്ചിരിക്കും. കേരളത്തിലെ നഴ്സറികളിൽ ഇതിന്റെ ഗുണമേന്മയനുസരിച്ച് 500 രൂപ മുതൽ 1,500 രൂപ വരെ വില ഈടാക്കാറുണ്ട്.
കുറഞ്ഞ സ്ഥലത്ത് കൂടുതൽ ആദായം ആഗ്രഹിക്കുന്ന കർഷകർക്ക് ശ്രീലങ്കൻ ഹൈബ്രിഡ് തെങ്ങുകൾ ഒരു മികച്ച വരുമാന മാർഗമാണ്. കൃത്യമായ നനയും ശാസ്ത്രീയമായ വളപ്രയോഗവും ഉറപ്പാക്കിയാൽ കേരളത്തിലെ കാലാവസ്ഥയിലും ഇവ മികച്ച വിളവ് ലഭിക്കും.