newsdesk
മുക്കം : നാഷണൽ ഇൻസ്റ്റിറ്റ്യൂട്ട് ഓഫ് ടെക്നോളജി കാലിക്കറ്റിന്റെ (NIT Calicut) വാർഷിക സാങ്കേതിക-മാനേജ്‌മെൻ്റ് ഫെസ്റ്റിവലായ ‘തത്വ ’26’ (TATHVA ’26) സിൽവർ ജൂബിലി പതിപ്പ് കാമ്പസിൽ വർണ്ണാഭമായി ഉദ്ഘാടനം ചെയ്തു. ദക്ഷിണേന്ത്യയിലെ ഏറ്റവും വലിയ ടെക്നോ-മാനേജ്‌മെൻ്റ് ഫെസ്റ്റിവലായ തത്വയുടെ 25-ാം വാർഷിക ആഘോഷങ്ങൾ ഒക്ടോബർ 9 മുതൽ 11 വരെ മൂന്ന് ദിവസങ്ങളിലായാണ് സംഘടിപ്പിക്കുന്നത്.
സോഹോ (Zoho) എച്ച്.ആർ ലീഡർ ചാൾസ് ഗോഡ്‌വിൻ ചടങ്ങിൽ മുഖ്യാതിഥിയായി പങ്കെടുത്ത് ഫെസ്റ്റിവൽ ഉദ്ഘാടനം ചെയ്തു. റെക്കാ ചാരിറ്റബിൾ സൊസൈറ്റി (RECCAA) സെക്രട്ടറി പ്രശാന്ത് പിള്ള വിശിഷ്ടാതിഥിയായിരുന്നു. എൻ.ഐ.ടി കാലിക്കറ്റ് ഡയറക്ടർ പ്രൊഫ. പ്രസാദ് കൃഷ്ണ ചടങ്ങിൽ അധ്യക്ഷത വഹിച്ചു.
യുവമനസ്സുകൾ ചോദ്യങ്ങൾ ചോദിക്കാനും പരീക്ഷണങ്ങൾ നടത്താനും മാറ്റങ്ങൾ സൃഷ്ടിക്കുന്ന പുതിയ ആശയങ്ങൾ രൂപപ്പെടുത്താനും സാങ്കേതികവിദ്യ ഉപയോഗിക്കുമ്പോഴാണ് അത് ഏറ്റവും ശക്തമാകുന്നത്,” എന്ന് മുഖ്യാതിഥിയായ ചാൾസ് ഗോഡ്‌വിൻ ഉദ്ഘാടന പ്രസംഗത്തിൽ പറഞ്ഞു. ക്ലാസ് മുറികൾക്കപ്പുറത്തേക്ക് ചിന്തിക്കാനും, പുതിയ സാധ്യതകൾ തേടാനും, സാങ്കേതിക വിദ്യയെ തങ്ങളുടെ സർഗ്ഗാത്മകതയുമായി സമന്വയിപ്പിക്കാനും തത്വ പോലുള്ള വേദികൾ വിദ്യാർത്ഥികൾക്ക് കരുത്തുപകരുന്നുവെന്നും അദ്ദേഹം കൂട്ടിച്ചേർത്തു.
അസ്റ്റീരിയ’ (Asteria) എന്ന പേരിട്ടിരിക്കുന്ന ബഹിരാകാശ അധിഷ്ഠിത ആധുനിക പ്രമേയത്തിലാണ് ഇത്തവണത്തെ ഫെസ്റ്റ് ഒരുക്കിയിരിക്കുന്നത്. ‘കോസ്മോ പോളോ’ (Cosmo Polo) എന്ന മസ്കറ്റാണ് തത്വ ’26-ന്റെ ദൃശ്യാവിഷ്കാരങ്ങൾക്ക് നേതൃത്വം നൽകുന്നത്. മൂന്ന് ദിവസങ്ങളിലായി രാജ്യത്തിന്റെ വിവിധ ഭാഗങ്ങളിൽ നിന്നായി എൺപതിനായിരത്തിലധികം (80,000) വിദ്യാർത്ഥികളും സന്ദർശകരും ഫെസ്റ്റിവലിൽ പങ്കാളികളാകുമെന്ന് സംഘാടകർ അറിയിച്ചു.
ഉദ്ഘാടന ദിനത്തിൽ റോബോട്ടിക്സ് പ്രേമികൾക്കായി സംഘടിപ്പിച്ച ‘റോബോ വാർ’ (Robo War) ശ്രദ്ധേയമായി. കൂടാതെ പ്രമുഖ പ്രാസംഗികൻ ജോസഫ് അന്നംകുട്ടി ജോസിന്റെ പ്രത്യേക ടോക്ക് ഷോയും ആദ്യദിനത്തിലെ പ്രധാന ആകർഷണമായിരുന്നു. സാങ്കേതിക-മാനേജ്‌മെൻ്റ് മത്സരങ്ങൾ, സംരംഭകത്വ ശിൽപശാലകൾ, സാംസ്കാരിക പരിപാടികൾ എന്നിവ വരും ദിവസങ്ങളിലും തുടരും.