Web Desk
കോഴിക്കോട് കൊവിഡ് വ്യാപനം രൂക്ഷം. ജില്ലയിലെ കൊവിഡ് സാഹചര്യം കണക്കിലെടുത്ത് കഴിഞ്ഞയാഴ്ച തന്നെ ജില്ലാ ഭരണകൂടം മാര്ഗനിര്ദേശങ്ങള് പുറത്തിറക്കിയിരുന്നു. പൊതുയോഗങ്ങള് പാടില്ലെന്നും ബസുകളില് നിന്ന് യാത്ര ചെയ്യാന് അനുവദിക്കില്ലെന്നും നിര്ദേശമുണ്ട്. പൊതു ഇടങ്ങളില് ആള്ക്കൂട്ടം അനുവദിക്കില്ല. ബീച്ചില് നിയന്ത്രണം നടപ്പിലാക്കുമെന്നും ആവശ്യമെങ്കില് സമയം ക്രമീകരിക്കുമെന്നും ജില്ലാ കളക്ടര് അറിയിച്ചു. പരിശോധന ശക്തമാക്കാന് മോട്ടോര് വാഹന വകുപ്പിനോട് ആവശ്യപ്പെടും. പരിശോധനയ്ക്കായി കൂടുതല് സെക്ടറല് മജിസ്ട്രേറ്റുമാരെ നിയോഗിക്കുമെന്നും ജില്ലാ ഭരണകൂടം അറിയിച്ചു.
ജില്ലയില് 4016 പേര്ക്കാണ് കഴിഞ്ഞ ദിവസം കൊവിഡ് സ്ഥിരീകരിച്ചത്. 42.70 ശതമാനമാണ് ജില്ലയിലെ ടെസ്റ്റ് പോസിറ്റിവിറ്റി നിരക്ക്. 19710 പേര് നിലവില് ചികിത്സയിലുണ്ട്. മെഡിക്കല് കോളജ് ആശുപത്രിയില് 17 ആരോഗ്യ പ്രവര്ത്തകര്ക്ക് കൂടി കൊവിഡ് സ്ഥിരീകരിച്ചിട്ടുണ്ട്.