WebDesk
തിരുവനന്തപുരം: ബലാത്സംഗം അടക്കമുള്ള കേസുകളില് പ്രതിയായ ബേപ്പൂര് കോസ്റ്റല് സി.ഐ. പി.ആര്.സുനുവിനെ സര്വീസില്നിന്ന് പിരിച്ചുവിട്ടു. തിങ്കളാഴ്ച സംസ്ഥാന പോലീസ് മേധാവിയാണ് സുനുവിനെ പിരിച്ചുവിട്ടുകൊണ്ടുള്ള ഉത്തരവിറക്കിയത്. പോലീസ് ആക്ടിലെ 86-ാം വകുപ്പ് പ്രകാരമാണ് നടപടി. ആദ്യമായാണ് ഈ വകുപ്പ് ഉപയോഗിച്ച് ഒരു പോലീസ് ഉദ്യോഗസ്ഥനെ സര്വീസില്നിന്ന് പിരിച്ചുവിടുന്നത്. തുടര്ച്ചയായി കുറ്റകൃത്യം ചെയ്യുന്നയാള് പോലീസില് തുടരാന് യോഗ്യനല്ലെന്നാണ് ഡി.ജി.പി.യുടെ ഉത്തരവില് പറയുന്നത്. ബലാത്സംഗം അടക്കം ഒട്ടേറെ ക്രിമിനല് കേസുകളാണ് സുനുവിനെതിരേയുള്ളത്. ഇതില് നാലെണ്ണം പീഡനവുമായി ബന്ധപ്പെട്ട കേസുകളാണ്. 15 തവണ ഇയാള്ക്കെതിരേ വകുപ്പുതല നടപടി സ്വീകരിച്ചു. സര്വീസ് കാലയളവില് ആറ് സസ്പെന്ഷനും കിട്ടി. ഏറ്റവും ഒടുവില് തൃക്കാക്കര പോലീസ് സ്റ്റേഷനിലാണ് സുനുവിനെതിരേ കേസ് രജിസ്റ്റര് ചെയ്തിരുന്നത്. തട്ടിപ്പുകേസിലെ പ്രതിയുടെ ഭാര്യയായിരുന്നു പരാതിക്കാരി.