Web Desk
സംസ്ഥാനത്ത് വ്യാഴാഴ്ച എല്ലാ ജില്ലകളിലും ശക്തമായ മഴയ്ക്ക് സാധ്യതയെന്ന് കാലാവസ്ഥാ വകുപ്പിന്റെ മുന്നറിയിപ്പ്. സംസ്ഥാനത്ത് വിവിധയിടങ്ങളില് ശക്തമായ കാറ്റ് വീശാനും സാധ്യതയുണ്ട്. അടുത്ത അഞ്ച് ദിവസം സംസ്ഥാനത്ത് ഇടിയോട് കൂടിയ മഴയുണ്ടാകുമെന്നാണ് മുന്നറിയിപ്പ്. തെക്കന് ആന്റമാന് കടലിന് മുകളില് രൂപപ്പെട്ട ചക്രവാതച്ചുഴി ന്യൂനമര്ദമായി ശക്തിപ്രാപിക്കാന് ഇടയുണ്ടെന്ന് കണ്ടെത്തിയ പശ്ചാത്തലത്തിലാണ് മുന്നറിയിപ്പ്.
ശക്തമായ കാറ്റിനും ഇടിമിന്നലിനും സാധ്യതയുള്ളതിനാല് പൊതുജനങ്ങള് ജാഗ്രത പുലര്ത്തണമെന്ന് ദുരന്തനിവാരണ അതോറിറ്റി ഉത്തരവിറക്കി. മഴ പെയ്യുമ്പോള് മരങ്ങളുടെ ചുവട്ടില് നില്ക്കരുതെന്നും വീട്ടിലേക്ക് ചാഞ്ഞുനില്ക്കുന്ന മരച്ചില്ലകള് വെട്ടിക്കളയണമെന്നും നിര്ദേശമുണ്ട്.