News Desk
കോഴിക്കോട്∙ കക്കോടി ബവ്റിജസ് സെൽഫ് സർവീസ് ഔട്ട്‌ലെറ്റിൽ നിന്നു സ്ഥിരമായി മദ്യക്കുപ്പികൾ മോഷ്ടിച്ച യുവാക്കൾ പിടിയിൽ. നാലു ദിവസങ്ങളിലായി 11 കുപ്പി മദ്യം കവർന്ന നാലുപേരിൽ രണ്ടുപേരാണ് പിടിയിലായത്. അന്നശ്ശേരി പരപ്പാറ എടവനക്കുഴി കോളനിയിലെ മുഹമ്മദ് ആസിഫ് (20), സച്ചിൻ പ്രഭാകരൻ (23) എന്നിവരെയാണ് ചേവായൂർ പൊലീസ് കഴിഞ്ഞ ദിവസം അറസ്റ്റു ചെയ്തത്. 3000 രൂപവരെ വിലയുള്ള ഇന്ത്യൻ നിർമിത വിദേശമദ്യമാണ് യുവാക്കൾ മോഷ്ടിച്ചത്.
അവധി കഴിഞ്ഞ് ബവ്റിജസ് മാനേജർ ജോലിയിൽ തിരികെയെത്തി കണക്കെടുത്തപ്പോഴാണ് കുപ്പികളുടെ കുറവു കണ്ടെത്തിയത്. സിസിടിവി ദൃശ്യങ്ങൾ പരിശോധിച്ചപ്പോഴാണ് മോഷണം കണ്ടെത്തിയത്. മേയ് 16, 19, 24, 25 തീയതികളിലാണ് മോഷണം നടന്നത്. തിരക്കുള്ള സമയത്തായിരുന്നു കുപ്പിമോഷണം. ഔട്ട്‌ലെറ്റിനകത്തു കയറി നാലുപേരും കുപ്പികളെടുക്കുന്നതും അരയിലേക്കു തിരുകി വയ്ക്കുന്നതും സിസിടിവി ദൃശ്യങ്ങളിൽ കാണാം. ഇതോടെ, മാനേജർ പൊലീസിൽ പരാതി നൽകുകയായിരുന്നു. പിടിയിലാകാനുള്ള രണ്ടുപേരെക്കുറിച്ച് പൊലീസിനു വിവരം ലഭിച്ചിട്ടുണ്ട്. അറസ്റ്റിലായ രണ്ടുപേരെയും ഇന്ന് കോടതിയിൽ ഹാജരാക്കും.