Web Desk
എവറസ്റ്റ് കൊടുമുടി കീഴടക്കുന്ന ആദ്യ ഖത്തരി വനിതയാവാനുള്ള തയ്യാറെടുപ്പിലാണ് ഖത്തരി രാജകുടുംബത്തില് നിന്നുള്ള ഷെയ്ഖ് അസ്മ അല്താനി എന്ന സാഹസിക കായികതാരം. അതോടൊപ്പം ലോകത്തെ ഏഴ് കൊടുമുടികളും രണ്ട് ധ്രുവങ്ങളിലും കാലുകുത്തുന്നതിലൂടെ എക്സ്പ്ലോറേഴ്സ് ഗ്രാന്ഡ് സ്ലാം പൂര്ത്തിയാക്കുന്ന മിഡില് ഈസ്റ്റില് നിന്നുള്ള ആദ്യ വനിതയാകുകയെന്ന ലക്ഷ്യവും കൂടി ഖത്തര് ഒളിമ്പിക് കമ്മിറ്റിയിലെ മുതിര്ന്ന ഉദ്യോഗസ്ഥയായ ഷെയ്ഖ അസ്മയ്ക്കുണ്ട്. എവറസ്റ്റ് കീഴടക്കാന് ശ്രമിക്കുന്ന മൂന്നാമത്തെ ഖത്തറിയാണ് അവര്. വിജയിച്ചാല്, സമുദ്രനിരപ്പില് നിന്ന് 8,849 മീറ്റര് ഉയരത്തില് സ്ഥിതിചെയ്യുന്ന എവറസ്റ്റ് കൊടുമുടി കീഴടക്കുന്ന ആദ്യത്തെ ഖത്തറി വനിതയാകും ഈ സ്പോര്ട്സ് താരം.
ഇത്തരം ഉയര്ന്ന നേട്ടങ്ങള് കൈവരിക്കുന്ന നിരവധി ഖത്തറി സ്ത്രീകളില് ആദ്യത്തെയാളാകുക എന്നതാണ് തന്റെ ആത്യന്തിക സ്വപ്നമെന്ന് 31കാരിയായ അസ്മ പറയുന്നു. എന്റെ കഴിവിന്റെ പരിധികളെ വെല്ലുവിളിക്കുന്നുവെന്നതിനാലാണ് പര്വതാരോഹണത്തിലേക്ക് തിരിയാന് എനിക്കുള്ള പ്രചോദനം. അടുത്ത തലമുറയിലെ സ്ത്രീകള്ക്ക് അവരുടെ സ്വപ്നങ്ങള് സാക്ഷാത്കരിക്കാന് ഇത്തരം നേട്ടങ്ങള് പ്രചോദനമാവും, ചെറുപ്പം മുതലേ പര്വതാരോഹണമെന്ന സ്വപ്നവുമായി നടന്നിരുന്ന അവര് പറഞ്ഞു.
ഒമ്പത് എക്സ്പ്ലോറര് ഗ്രാന്ഡ്സ്ലാം വെല്ലുവിളികളില് മൂന്നെണ്ണം ശെയ്ഖ അസ്മ ഇതിനകം പൂര്ത്തിയാക്കിക്കഴിഞ്ഞു. 2018ല് യൂറോപ്പില് നിന്നും മിഡില് ഈസ്റ്റില് നിന്നുമുള്ള വനിതാ ടീമിന്റെ ഭാഗമായി ഉത്തരധ്രുവത്തിലെത്തി ഈ നേട്ടം കൈവരിക്കുന്ന ആദ്യ ഖത്തരി വനിതയായി. 2019ല് അക്കോണ്കാഗ്വ കൊടുമുടി കീഴടക്കി. 2014ല് കിളിമഞ്ചാരോയിലെത്തിയ ഖത്തരി വനിതകളുടെ ആദ്യ സംഘത്തിലെ അംഗമായിരുന്നു. ഒന്പത് വെല്ലുവിളികള് ഏറ്റവും കടുപ്പമേറിയതാണ് എവറസ്റ്റെന്നും അത് കീഴടക്കാനുള്ള ഒരുക്കങ്ങള് വലിയ ആത്മവിശ്വാസം പകര്ന്നുനല്കുന്നതായും അവര് പറഞ്ഞു.