Web Desk
നിയമസഭാ തെരഞ്ഞെടുപ്പ് അടുത്തിരിക്കെ കോൺഗ്രസ് നേതാക്കളടക്കമുള്ളവർ ബിജെപിയടക്കമുള്ള പാർട്ടിയിലേക്ക് എത്തുമ്പോൾ എന്തുകൊണ്ടാണ് താൻ കോൺഗ്രസ് പാർട്ടിയെ തെരഞ്ഞെടുത്തതെന്ന് വ്യക്തമാക്കി തെന്നിന്ത്യൻ നടി ഷക്കീല.
പിതാവിനോടുള്ള സ്നേഹത്താലാണ് കോൺഗ്രസിൽ അംഗത്വമെടുത്തതെന്ന് തെന്നിന്ത്യൻ നടി ഷക്കീല പറഞ്ഞു. “കോൺഗ്രസ് പാർട്ടിയെ ഞാൻ സ്നേഹിക്കുന്നുണ്ട്. അച്ഛനിൽ നിന്നാണ് ഈ പാർട്ടിയെക്കുറിച്ച് അറിയാൻ സാധിച്ചത്. അദ്ദേഹം കോൺഗ്രസ് പാർട്ടിയെ സ്നേഹിച്ചിരുന്നു. അച്ഛനോടുള്ള സ്നേഹസൂചകമായാണ് പാര്ട്ടിയില് ചേര്ന്നത്” – എന്നും അവർ പറഞ്ഞു.
അച്ഛനോടുള്ള സ്നേഹം കൊണ്ടും നല്ല കാര്യങ്ങൾ ചെയ്യണമെന്ന ആഗ്രഹം കൊണ്ടുമാണ് കോൺഗ്രസിൽ അംഗത്വമെടുക്കണമെന്ന് കരുതിയതെന്നും ഷക്കീല കൂട്ടിച്ചേർത്തു. തെന്നിന്ത്യൻ താരമായ ഖുശ്ബു കോൺഗ്രസ് വിട്ട് ബിജെപിയിൽ ചേർന്നത് ചൂണ്ടിക്കാണിച്ചപ്പോൾ അത്തരത്തിൽ താൻ പാർട്ടി മാറാൻ ആഗ്രഹിക്കുന്നില്ലെന്ന് അവർ പറഞ്ഞു.
പാർട്ടി മാറുന്നത് ഓരോരുത്തരുടെയും ഇഷ്ടമാണ്. അങ്ങനെ പാർട്ടി മാറാൻ ഞാൻ ഉദ്ദേശിക്കുന്നില്ല. അഭിനയും തുടരുന്നതിനൊപ്പം തന്നെ രാഷ്ട്രീയ പ്രവർത്തനങ്ങൾ മുന്നോട്ട് കൊണ്ട് പോകുമെന്നും അവർ പറഞ്ഞു.
തമിഴ്നാട് കോൺഗ്രസിന്റെ മനുഷ്യാവകാശ വിഭാഗത്തിലായിരിക്കും ഷക്കീലയുടെ പ്രവർത്തനമെന്നാണ് റിപ്പോർട്ടുകൾ. തമിഴ്നാട് നിയമസഭാ തെരഞ്ഞെടുപ്പിൽ ഡിഎംകെയുടെ നേതൃത്വത്തിലുള്ള സഖ്യത്തിന്റെ ഭാഗമായാണ് കോൺഗ്രസ് മത്സരിക്കുന്നത്. തെന്നിന്ത്യൻ സിനിമകളിലെ നിറസാന്നിധ്യമായിരുന്ന ഷക്കീല തമിഴ്നാടിൽ നിയമസഭാ തെരഞ്ഞെടുപ്പ് അടുത്തിരിക്കെയാണ് കോൺഗ്രസ് പ്രവേശനം നടത്തിയത്.