അച്ഛനും മകനും തമ്മിലുള്ള പോരാട്ടമാണ് പുതുപ്പള്ളിയിൽ ഇനി നടക്കാൻ പോവുന്നത്; ചാണ്ടി ഉമ്മന് വേണ്ടി എ കെ ആന്റണിയെത്തും; ബിജെപി സ്ഥാനാർഥി ലിജിന് വോട്ട് തേടിഇറക്കുന്നത് അനിൽ ആന്റണിയെയും

newsdesk

കോട്ടയം: പുതുപ്പള്ളിയിൽ ഇനി പോര് അച്ഛനും മകനും തമ്മിൽ നടക്കും . പുതുപ്പള്ളിയിലെ കോൺഗ്രസ്സ് – ബിജെപി സ്ഥാനാർഥികൾക്കായി പ്രചാരത്തിനായി ഇറക്കുന്നത് എ കെ ആന്റണിയും അനിൽ ആന്റണിയും. ഇതോടെ പുതുപ്പള്ളി ഉപതെരഞ്ഞെടുപ്പ് പ്രചാരണത്തിന് ചൂടുപിടിക്കുമെന്ന കാര്യത്തിൽ സംശയമില്ല. കോൺഗ്രസ് പ്രവർത്തകസമിതി അംഗം എകെ ആന്റണി ഇന്ന് രണ്ടു പഞ്ചായത്തുകളിൽ പൊതുയോഗങ്ങളിൽ പ്രസംഗിക്കും. അതേസമയം ബിജെപി സ്ഥാനാർത്ഥി ലിജിന് വേണ്ടി അനിൽ ആന്റണിയും പ്രചാരണ രംഗത്തുണ്ട്.

പുതുപ്പള്ളി മണ്ഡലത്തിൽ പരസ്യപ്രചാരണം അവസാനിക്കാൻ മൂന്നുദിവസം മാത്രമാണ് ഇനി ബാക്കി നിൽക്കുന്നത്. പ്രധാന നേതാക്കളെല്ലാം ഇന്ന് പ്രചാരണ രംഗത്തുണ്ട്. കെപിസിസി പ്രസിഡണ്ട് കെ സുധാകരൻ, കെ മുരളീധരൻ തുടങ്ങിയ നേതാക്കളും മണ്ഡലത്തിൽ ഉണ്ട്. അവസാനഘട്ട പ്രചാരണത്തിനായി മുഖ്യമന്ത്രിയും ഇന്ന് പുതുപ്പള്ളിയിൽ എത്തും. മൂന്നിടങ്ങളിലാണ് മുഖ്യമന്ത്രി പൊതുയോഗത്തിൽ പ്രസംഗിക്കുന്നത്.

അതിനിടെ ചാണ്ടി ഉമ്മൻ – ജെയ്ക് സി തോമസ് നേർക്കുനേർ സംവാദത്തിനും കളമൊരുങ്ങുകയാണ്. വികസന കാര്യത്തിൽ ചർച്ചയ്ക്കുണ്ടോയെന്ന ജെയ്ക്കിന്‍റെ വെല്ലുവിളി ഏറ്റെടുത്ത ചാണ്ടി ഉമ്മൻ, ഉമ്മൻ ചാണ്ടിയുടെ വികസന പ്രവർത്തനങ്ങൾ എണ്ണിയെണ്ണി പറയാനുണ്ടെന്നും പറഞ്ഞു. ജെയ്ക്കിന്‍റെ മറുപടി കൂടി വന്നാൽ സംവാദത്തിന്‍റെ സമയവും സ്ഥലവും മാത്രം തീരുമാനിച്ചാൽ മതിയാകും. പ്രചാരണം ഇനി മൂന്ന് ദിവസം കൂടിയേയുള്ളൂ. സെപ്തംബർ അഞ്ചിനാണ് തെരഞ്ഞെടുപ്പ്. എട്ടിന് വോട്ടെണ്ണും