Web Desk
സംസ്ഥാനത്ത് കോവിഡ് കേസുകള് വര്ധിക്കാതിരിക്കാന് എല്ലാവരുടേയും സഹകരണവും ശ്രദ്ധയും ഉണ്ടാകണമെന്ന് ആരോഗ്യ വകുപ്പ് മന്ത്രി വീണാ ജോര്ജ്. എല്ലാ ജില്ലകള്ക്കും പ്രതിരോധം ശക്തമാക്കാന് നിര്ദേശം നല്കിയിട്ടുണ്ടെന്നും കോവിഡ് കേസുകള് 1000ന് മുകളില് റിപ്പോര്ട്ട് ചെയ്ത എറണാകുളം, തിരുവനന്തപുരം ജില്ലകള്ക്ക് പ്രത്യേക ജാഗ്രത നല്കിയിട്ടുണ്ടെന്നും മന്ത്രി അറിയിച്ചു.
സംസ്ഥാനത്ത് കോവിഡ് കേസുകള് ചെറുതായി ഉയരുന്നെങ്കിലും ആശങ്കപ്പെടേണ്ട കാര്യമില്ല. ആശുപത്രികളിലും ഐസിയുവിലും ചികിത്സ തേടുന്നവരുടെ എണ്ണം കുറവാണ്. 27,991 ആക്ടീവ് കേസുകളുണ്ടായിരുന്നതില് 1285 പേര് ആശുപത്രികളിലും 239 പേര് ഐസിയുവിലും 42 വെന്റിലേറ്ററുകളിലും ചികിത്സയിലുള്ളത്. പ്രായമായവരിലും അനുബന്ധ രോഗമുള്ളവരിലും വാക്സിന് എടുക്കാത്തവരിലുമാണ് കൂടുതലും രോഗം ഗുരുതരമാകുന്നത്. അതിനാല് തന്നെ അവര് കൂടുതല് ശ്രദ്ധിക്കണമെന്നും മന്ത്രി പറഞ്ഞു.