newsdesk
ഓമശ്ശേരി∙ ഗതാഗതക്കുരുക്ക് രൂക്ഷമായ ടൗണിൽ ആവശ്യത്തിന് സീബ്ര ലൈനുകളില്ലാത്തത് അപകട ഭീഷണിയുയർത്തുന്നു. റീബിൽഡ് കേരള പദ്ധതിയുടെ ഭാഗമായി നടപ്പിലാക്കിയ എടവണ്ണ–കൊയിലാണ്ടി സംസ്ഥാന പാത നവീകരണത്തോടെയാണ് സീബ്ര ലൈനുകൾ അപ്രത്യക്ഷമായത്. കാൽനടയാത്രക്കാർ നിരന്തരം റോഡ് മുറിച്ച് കടക്കുന്ന ഓമശ്ശേരി ടൗണിൽ അപകട സാധ്യത വിളിച്ചുവരുത്തുന്നതാണ് നിലവിലെ സാഹചര്യം. മുൻപ് സീബ്ര ലൈൻ ഉണ്ടായിരുന്ന പലയിടത്തും അത് മാഞ്ഞു പോയിട്ടുണ്ട്. റോഡ് പ്രവൃത്തിയുടെ ഭാഗമായും സീബ്ര ലൈൻ നഷ്ടമായി.
ഓമശ്ശേരി ടൗണിലെ വിദ്യാപോഷിണി എൽപി സ്കൂൾ പരിസരം, ബാങ്ക് ജംക്‌ഷൻ, ഹൈവേ ജംക്‌ഷൻ, ബസ് സ്റ്റാൻഡിന് മുൻവശം, ആശുപത്രി ജംക്‌ഷൻ എന്നിവയ്ക്ക് മുന്നിലെ സീബ്ര ലൈനുകളാണ് അപ്രത്യക്ഷമായത്. ടൗണിൽ ആവശ്യത്തിന് ട്രാഫിക് മുന്നറിയിപ്പ് ബോർഡുകളില്ലാത്തതും അപകട സാധ്യത വർധിപ്പിക്കുന്നു. നിരവധി ക്വാറികൾ സമീപ പ്രദേശങ്ങളിൽ പ്രവർത്തിക്കുന്നതിനാൽ ടിപ്പർ ലോറികളടക്കമുള്ള വലിയ വാഹനങ്ങൾ കടന്നുപോകുന്ന ടൗണാണ് ഓമശ്ശേരിയിലേത്.