ദുബായ്: ഇന്ത്യ അടക്കം കൂടുതൽ രാജ്യങ്ങൾക്ക് യു.എ.ഇ സന്ദർശക വിസ നൽകിത്തുടങ്ങി. ബുധനാഴ്ച മുതലാണ് വിസ നടപടിക്രമം ആരംഭിച്ചത്. ഒട്ടേറെ പേർ ആദ്യദിനം തന്നെ വിസക്ക് അപേക്ഷിച്ചതായി ട്രാവൽ ഏജൻസികൾ അറിയിച്ചു. കോവിഡ്-19 നെ തുടർന്ന് മാർച്ച് മുതൽ ദുബായ് സന്ദർശക വിസ അനുവദിക്കുന്നത് നിർത്തലാക്കിയിരുന്നു. ഇന്ത്യക്കാരടക്കം ഒട്ടേറെ രാജ്യക്കാർ സന്ദർശക വിസ അനുവദിക്കുന്നത് കാത്തിരിക്കുകയായിരുന്നു. എല്ലായിടത്തു നിന്നും ആളുകൾ ജോലി അന്വേഷിച്ചെത്താറുള്ളത് സന്ദർശക വിസയിലാണ്. എല്ലാ രാജ്യങ്ങൾക്കും ടൂറിസ്റ്റ് വിസയും അനുവദിച്ചു തുടങ്ങിയിട്ടുണ്ട്.
അതേസമയം ഇന്ത്യയിൽ നിന്ന് അബുദാബി, ദുബായ്, ഷാർജ എന്നിവിടങ്ങളിലേക്കുള്ള വിമാനങ്ങൾ ഇന്നലെ (ജൂലൈ 31) മുതൽ പുനരാരംഭിക്കുമെന്ന് എയർ ഇന്ത്യ എക്സ്പ്രസ് വ്യാഴാഴ്ച വൈകിട്ട് അറിയിച്ചു.വന്ദേ ഭാരത് മിഷനു കീഴിലുള്ള സ്വദേശത്തേക്ക് മടങ്ങുന്ന വിമാനങ്ങളിൽ നിന്ന് ഇന്ത്യ-യുഎഇ വിമാനങ്ങൾക്കായി എയർലൈൻ ബുക്കിംഗ് ആരംഭിച്ചു. മാർച്ച് മുതൽ ഇന്ത്യയിൽ കുടുങ്ങിക്കിടക്കുന്ന നിരവധി താമസക്കാർക്ക് സ്വാഗതാർഹമായാണ് ഈ വാർത്ത വരുന്നത്.